5 ministrat e rinj në kabinetin qeveritar ‘Rama 3’

Pesë emra të rinj u lakuan në kabinetin qeveritar Rama 3. Bëhet fjalë për:

• Ulsi Manja – ministër i Drejtësisë
• Delina Ibrahimi – ministre e Ekonomisë
• Frida Krifca – ministre e Bujqësisë
• Bora Muzhaqi – ministre e Shtetit për Rininë
• Edona Bilali – ministre e Shtetit për Mbrojtjen e Sipërmarrjes

Ulsi Manja më herët ka qenë kryetar i Komisionit të Ligjeve. Ai ka lindur në qytetin e Dibrës në datë 5 Tetor 1973. Manja ka një karrierë të pasur në fushën e drejtësisë. Nga viti 1996-2013 ka punuar ai avokat, prokuror, gjyqtar dhe drejtues prokurorie.

Në qershor të vitit 2009 u përfshi në politikë duke u bërë pjesë e listës së Partisë Socialiste në qarkun e Dibrës dhe nga korriku i vitit 2010 është drejtues i degës lokale të PS-së në Dibër.

Gjatë asamblesë së Partisë Socialiste, kryeministri Edi Rama prezantoi emrin e tij si drejtues qarku në Dibër. Ai zëvendëson Etilda Gjonajn.

Delina Ibrahimi më herët ka qenë drejtore e Tatimeve. Ajo është e diplomuar për Ekonomi Ndërkombëtare në Universitetin Bocconi të Milanos. Ibrahimi ka punuar në Bankën e Shqipërisë mes viteve 2010-2015 dhe gjatë periudhës gjatë periudhës 2015-2016 ka punuar si koordinatore për krijimin e një sistemi të integruar të informacionit dhe statistikave operacionale qeveritare në Kryeministri.

Ajo zëvendëson Anila Denajn.

Frida Krifca më herët ka qenë kryetare e AZHBR-së (Agjencia për Zhvillim Bujqësor dhe Rural). Ajo ka një përvojë 22-vjeçare në administrim e menaxhim, me fokus të veçantë ndaj zhvillimit të sektorit financiar, përdorimit të shërbimeve financiare si dhe zhvillimit të biznesit. Krifca është diplomuar nga Universiteti i Tiranës, në Fakultetin e Ekonomisë, dega Administrim Biznes dhe mban titullin Master i Shkencave në Administrim Biznesi (MBA) nga Fakulteti i Administrim Biznesit pranë Universitetit Akron në Ohajo, SHBA.

Ajo zëvendëson Milva Ikonomin.

Bora Muzhaqi u diplomua në degën e Ekonomisë në London School of Economics and Political Science, në Londër, e më pas vijoi studimet në nivelin Master, gjithashtu në Londër. Nga dhjetori 2013 deri më Janar 2017 punoi si konsulente dhe konsulente e lartë pranë degës shqiptare të kompanisë ndërkombëtare PwC.

Muzhaqi mban titullin ACCA, pasi kaloi me sukses shkallët e kualifikimit për të fituar të drejtën e Auditueses Ligjore në Mbretërinë e Bashkuar.  Aktualisht ajo është Audituese Ligjore e çertifikuar edhe në Republikën e Shqipërisë. Ajo ka marrë një post në një ministri të re.

Edona Bilali vjen rishtaz në politikë. Ajo kryesoi listën e PS-së për qarkun e Shkodrës dhe është zgjedhur për herë të parë deputete e Kuvendit të Shqipërisë. Në pozicionin e ri ajo zëvendëson Eduard Shalsin.

LEXONI GJITHASHTU: 

• Drejtuesit e rinj të Partisë Socialiste në qarqe