812 të vdekur në 24 orë, Spanja bëhet vendi i tretë që ia kalon Kinës për të infektuar, ndërkohë që Vuhani rihap bizneset

Numri i të infektuarve në Spanjë, në 24 orët e fundit, është shtuar me 6398 persona, sipas ministrisë së shëndetësisë në vend. Të vdekurit janë shtuar me 812.

Spanja tani i  bashkohet SHBA-ve dhe Italisë, duke u bërë tre vendet që kanë më shumë të infektuar se Kina, e cila vazhdon të numërojë 82.156 raste.

Numri i të infektuarve në SHBA ka shkuar 143.000, me mbi 2500 të vdekur. Në Itali janë 97 mijë, me mbi 10 mijë të vdekur, në Spanjë janë tani gati 87 mijë, me 7340 të vdekur.

Ndërkohë, në qytetin ku nisi përhapja e coronavirusit që pushtoi gjithë botën, më në fund kanë nisur të hapen supermarketet dhe dyqanet ushqimore.

“Jam aq e gëzuar sa më vjen të qaj”, tha një grua që u mor në pyetje nga gazetarët teksa dilte nga supermarketi.

Vuhani kishte disa ditë që kishte hapur një numër të madh dyqanesh, por shumica kishin kufizime për numrin e personave që mund të futeshin njëherazi.

Vuhani tani ka gjashtë ditë që nuk shënon raste të reja të infektuarish brenda vendit, por të gjithë kanë qenë të importuara nga jashtë.