Analisti politik cilëson paradoks dy votat e opozitës për Lindita Nikollën

Për analistin politik Plator Nesturi zgjedhja e Lindita Nikollës Kryetare e Kuvendit me 79 vota “pro” ishte paradoksale. Ai argumentoi se në një ditë kur kishte përplasje mes opozitës nga kjo e fundit rrodhën dy vota “pro” ish-ministres së PS-së.

“Sot ka qenë një ditë paradoksesh, dhe një nga paradokset ka qenë edhe fakti që dy vota kanë ardhur nga opozita. Unë besoj se ato vota që i janë bashkuar, përveç votave që kanë ardhur nga PSD-ja votat shtesë duhet të jenë nga partitë e tjera aleate që kanë qenë me PD-në,” – tha Nesturi.

Sidoqoftë Nesturi nuk e konsideroi si një ngjarje domethënëse këtë për sa kohë PS i kishte votat e mjaftueshme për ta zgjedhur vetë Nikollën kryetare Kuvendi.

Për sa i përket çështjes Basha-Berisha, Nesturi tha se edhe mbajtja në grup parlamentar të tij do të sillte përçarje në PD. Sipas Nesturit kjo do të ndodhte pasi njësoj sikurse Berisha ka mbështetës, PD ka politikanë të rinj që nuk duan ta lidhin fatin e karrierës së tyre me çështjen e tij.

Sipas Nesturit “Basha e ka fituar betejën me Berishën”. Ai tha se me mbështetjen që dha sot ambasada e SHBA, është e qartë që tanimë ka një ndarje të mbështetësve dhe sot “kortezhi i bërë drejt Kuvendit ishte njëlloj solidariteti ndaj tij”.

LEXONI GJITHASHTU:

• Lindita Nikolla kryetare e Kuvendit, PD grisi fletët e votimit
• Berisha do e ketë të vështirë të marrë kontrollin e PD-së, thotë Erla Mëhilli
• Përplasja në PD ia bën më të lehtë qeverisjen Ramës, thotë gazetari
• Edith Harxhi: Më në fund Berisha kuptoi se Basha është peng i Ramës