‘A do të shtyhet orari i votimit’ Mëhilli: Shtyrja e orarit në 2017-tën i ka shtuar 1-2 mandate Ramës

Procesi i votimit do të mbyllet në orën 19:00 që është edhe orari zyrtar, mirëpo nëse në mjediset e votimit do të ketë ende persona që presin në radhë, atëherë procesi i votimit për personat e pranishëm do të vijojë, raportoi gazetari i Euronews Albania.

Ekspertja e komunikimit Erla Mëhilli përmendi në studion e Euronews Albania se në zgjedhjet e vitit 2017 u shty orari i votimit me një orë, gjë që për znj. Mëhilli ishte në disfavor të PD-së, pasi sipas saj, z. Rama e kërkoi shtyrjen e orarit për interesa të veta.

“Në vitin 2017 kur kishte ende marrëveshje midis z. Rama dhe z. Basha, u shty orari i votimit me një orë, u mbyll në orën tetë. Ishte një kërkesë e z. Rama, por e dakordësuar me z. Basha. Për mendimin tim ka qenë gabim nga ana e opozitës që e pranoi atë shtyrje. Nuk e ka kërkuar Edi Rama për t’i bërë favor opozitës” u shpreh Erla Mëhilli.

Sipas znj. Mëhilli PS-ja ka fituar një deri në dy mandate nga shtyrja e orarit në zgjedhjet e vitit 2017.

“Kam një bindje që një deri në dy mandate kanë shkuar plus për PS-në brenda një ore”, tha znj. Mëhilli.