Abazoviç: Pas çdo nacionalizmi në Mal të Zi qëndron korrupsioni

Kryeministri i qeverisë malazeze në mandat teknik, Dritan Abazoviç, thotë se korrupsioni qëndron pas çdo nacionalizmi në Mal të Zi dhe se çelësi i rënies së qeverisë së tij është vazhdimi i luftës kundër korrupsionit.

Në një intervistë për Slobodna Dalmacija të Splitit, Abazoviç thotë se në Mal të Zi nuk ka më njerëz të privilegjuar dhe të mbrojtur, siç kishte tridhjetë vjet më parë.

Duke sqaruar skenën aktuale politike në Mal të Zi, Abazoviç thotë se kanë kaluar dy vjet, dhe gjatë kësaj periudhe është arritur një qëllim i rëndësishëm, që Mali i Zi nuk është më një shtet unipolar por një shtet multipolar ku të gjitha subjektet janë të rëndësishme: nga çdo qytetar, nga partitë më të vogla e deri te subjektet e mëdha.

“Nuk ka më supremaci të asnjë partie, por të gjithë duhet të arrijmë një marrëveshje dhe të gjejmë zgjidhje pavarësisht nga dallimet politike. E drejta që mbrojti ndarjen po dobësohet dhe ne në thelb po luftojmë për karakterin e vendit tonë. Po luftojnë nëse Mali i Zi do të jetë europian, ekologjik, tolerant, progresiv apo i ndarë me antagonizma, atavizma, krim dhe korrupsion”, tha Abazoviç.

Ai theksoi se mendon se Mali i Zi është në rrugën e duhur, në të cilën nuk do të ishte më një shtet i robëruar.

LEXONI GJITHASHTU:

• Thirrja e Abazoviçit: Mali i Zi dhe Serbia të zgjidhin mosmarrëveshjet
• Abazoviç: Mali i Zi dhe Franca së bashku për paqe dhe përparim