Administrata Biden l Kush është sekretari i ri i shtetit dhe drejtuesja e inteligjencës kombëtare

Diplomati veteran amerikan Antony Blinken, i cili ka shërbyer si numri dy në Departamentin e Shtetit dhe si zëvendës Këshilltar i Sigurisë Kombëtare në administratën Obama është i zgjedhuri i presidentit të ardhshëm Joe Biden për postin e Sekretarit të Shtetit.

Një person kyç i politikave të jashtme të Obamas dhe njeri i besuar i Biden, 58-vjeçari Antony Blinken përshkruhet nga persona që kanë punuar me të, si “diplomati i diplomatëve” dhe një person i qetë, por i zoti në politikat e jashtme.

I lindur në Nju Jork dhe i shkolluar në Harvard, Blinken ka eksperienca në fushën e raportimit dhe praktikës juridike, ndërsa është angazhuar në politikë në fund të viteve ’80. 58-vjeçari është gjithashtu analist i çështjeve globale në CNN dhe zotëron një frëngjishte të kulluar.

Avril Haines do të drejtojë inteligjencën kombëtare në administratën e re të Shteteve të Bashkuara, duke u bërë e para grua që do të mbajë këtë post. Një ish-zëvendës këshilltare për sigurinë kombëtare nën presidencën Obama dhe e para grua që shërbeu në postin e zëvendësdrejtores së CIA-s, Haines është gjithashtu një prej personave më të besuar të Biden, me të cilin ka punuar për më shumë se një dekade.

51-vjeçarja ka një diplomë në fizikë nga Universiteti i Cikagos dhe një diplomë në juridik nga Universiteti i Xhorxhtaunit. Ajo gëzon respekt brenda komunitetit të inteligjencës, për intelektin, modestinë dhe etikën strikte të punës.