Aeroporti i Vlorës rrezik për shpendët, zhurma e kamionëve tremb pelikanët

Planet për të ndërtuar në Vlorë aeroportin më të madh të Shqipërisë, mund të shkatërrojë një nga strehëzat më spektakolare të Evropës për gjallesat.

Zhurma e kamionëve dhe ekskavatorëve po i tremb pelikanët dhe flamingot. Laguna piktoreske Vjosë-Nartë nën hijen e maleve të Bubullimës është një ndalesë vendimtare për tufat e shpendëve gjatë migrimit të tyre vjetor midis Evropës dhe Afrikës.

Në vitin 2004 laguna u shpall zonë e mbrojtur e folezimit dhe migrimit dhe është shtëpia e 200 llojeve të shpendëve. Qeveria thotë se një aeroport i ri në këtë zonë do të nxisë turizmin dhe është në përputhje me rregullat mjedisore.

“Ne kemi respektuar çdo hap, çdo afat kohor dhe çdo procedurë të ligjit shqiptar, qoftë për konsultimet publike apo edhe si do të ndikojë në mjedis”, u shpreh Mirela Kumbaro, ministre e Turizmit dhe Mjedisit.

Firma kryesore që ndërton aeroportin, Mabetex me bazë në Zvicër, nuk iu përgjigj e-maileve dhe mesazheve telefonike kur iu kërkua informacion.

Vëzhguesit e shpendëve e përshkruajnë këtë pjesë të Shqipërisë si një nga vendet më të mira në Evropë për të parë tufat e flamingove gjigantë rozë. Laguna është shtëpia e rreth 1.5% të të gjithë popullsisë globale të pelikanit dalmat – një nga zogjtë më të mëdhenj fluturues në botë, të cilët janë në rrezik zhdukjeje.

Një raportim i fundit nga Reuters thekson se ndërtimi i aeroportit në këtë zonë do të ishte shqetësues, për shkak të rrezikut se avionët mund të përplasen me shpendët. Por nëse qëllimi është të nxisë turizmin, si e presin bizneset lokale ndërtimin e aeroportit?

“Ndërtimi i aeroportit do të sillte një numër të ulët vizitorësh. Nuk do të vijnë turistët, do të prishet ekosistemi, fauna, flora”, u shpreh Arsen Lambro, pronar i një restorant peshku.

Por, ka ende pikëpyetje nëse jugu i vendit ka nevojë për një aeroport, pasi aeroporti kryesor është një orë e gjysmë larg. Sipas ekspertëve, në rast se vendoset të ndërtohet, ai duhet të jetë jashtë zonës së mbrojtur.

LEXONI GJITHASHTU:

• Qeveria thotë se aeroporti i Vlorës nuk do të ndërtohet në zonën e mbrojtur të Nartës