Afgani që qëlloi ushtarët e Gardës Kombëtare në Uashington ka punuar me CIA-n

Rahmanullah Lakanwal, i cili një ditë më parë sulmoi 2 ushtarë të Gardës në Uashington ndihmoi në ruajtjen e forcave amerikane në aeroportin e Kabulit, ndërsa mijëra njerëz nxituan për t’u larguar nga Afganistani përpara se talebanët të merrnin pushtetin, i tha BBC-së një ish-komandant ushtarak që shërbeu përkrah tij.

Babai i pesë fëmijëve ishte rekrutuar në Njësinë 03 të Forcës Sulmuese të Kandaharit nëntë vjet më parë. Njësia e tij njihej në nivel lokal si Forcat Akrep, duke vepruar fillimisht nën CIA-n, por përfundimisht për departamentin e inteligjencës afgane të njohur si Drejtoria Kombëtare e Sigurisë.

Lakanwal ishte specialist i gjurmuesve GPS, tha ish-komandanti për BBC-në, duke e përshkruar atë si një “personazh sportiv dhe të gëzuar”.

E gjithë njësia e tij u zhvendos nga Kandahari në Kabul pesë ditë para se talebanët të hynin në kryeqytet. Ata vazhduan ta mbronin aeroportin për gjashtë ditë të tjera, përpara se edhe ata të transportoheshin me helikopter në SHBA.