“Afrimi me Perëndimin, rrezik”, Lavrov paralajmëron Armeninë

Ministri i Jashtëm rus, Sergey Lavrov, i ka shprehur Kryetarit të Asamblesë Kombëtare të Armenisë, Alain Simonyan, shqetësimet e Moskës lidhur me afrimin e Jerevanit me vendet perëndimore, duke theksuar rreziqet që kjo mund të sjellë në dëm të bashkëpunimit me aleatët tradicionalë. Kështu thuhet në një deklaratë të Ministrisë së Jashtme ruse.

“Ne e kemi bërë të qartë rrezikun e afrimit me Perëndimin në dëm të bashkëpunimit me aleatët tradicionalë,” theksoi ministria.

Sipas deklaratës, gjatë takimit u zhvillua një shkëmbim i sinqertë dhe përmbajtjesor pikëpamjesh mbi çështjet aktuale të marrëdhënieve ruso-armene. Pala ruse riafirmoi angazhimin e saj për zbatimin e shpejtë të iniciativave që synojnë forcimin e lidhjeve ushtarako-politike, tregtare-ekonomike dhe kulturore-humanitare mes Moskës dhe Jerevanit.

Ministria bëri të ditur gjithashtu se u diskutua bashkëpunimi në kuadër të projekteve të integrimit në hapësirën euroaziatike. Në fokus të bisedimeve ishin edhe çështjet rajonale, përfshirë procesin e normalizimit të marrëdhënieve mes Armenisë dhe Azerbajxhanit, si dhe rëndësia e punës së vazhdueshme të Platformës 3+3 për Bashkëpunim Rajonal.