Agjentët e BKH mësyjnë në Elbasan, kontrolle në zyrat e një biznesi ndërtimi

Agjentët e Byrosë Kombëtare të Hetimit prej orëve të para të kësaj të enjteje janë duke ushtruar kontrolle të imtësishme në zyrat qendrore të një biznesi të madh në Elbasan në fushën e ndërtimeve dhe jo vetëm.

Agjentët e BKH kanë zbarkuar që në orën 06:30 në këtë qytet ku kanë sekuestruar fillimisht pas hapjes së zyrave celularët e punonjësve.

Me urdhër të prokurorit, agjentët kanë mbajtur procesverbal dhe kanë sekuestruar dosje, kompjuterë dhe aparate celularë të biznesit i cili rezulton se ka lidhje me hetimin dhe kontrollet që janë zhvilluar kohët e fundit për korrupsion kryesisht në disa bashki të Qarkut të Elbasanit.

Kompania e kontrolluar rezulton se ka përfituar tenderë të shumtë, mjaft prej të cilëve të dyshuar në mënyrë të paligjshme nga bashkitë e Qarkut të Elbasanit.

Në kuadër të këtyre hetimeve, agjentët të shumtë të BKH-së kanë zbarkuar në biznesin e tij të mbështetur edhe nga policia. Prokuroria e Posaçme po heton disa kompani të fuqishme ndërtimi me aktivitet jo vetëm në Elbasan por edhe në Tiranë e Durrës.