Akord kundër narkotrafikut, 6 vende të BE-së marrëveshje për rritjen e bashkëpunimit

Holanda, Belgjika, Gjermania, Franca, Italia dhe Spanja kanë arritur një marrëveshje për të rritur bashkëpunimin me vendet e Amerikës Latine me qëllim luftimin e trafikut të drogës.

Gjatë një takimi të zhvilluar të premten në Amsterdam mes ministrave të Drejtësisë dhe zyrtarëve nga të gjashta vendet u ra dakord të përforcohet siguria detare dhe ajo në porte, si dhe të intensifikohet përdorimi i teknologjisë për të frenuar bandat kriminale.

Amsterdami ka regjistruar një seri krimesh të dhunshme në vitet e fundit, përfshirë vrasjen e gazetarit të kronikës së zezë Peter de Vries dhe atë të avokatit të një dëshmitari që vinte nga bota e krimit të organizuar.

Holanda dhe Belgjika kanë në territoret e tyre portet e mëdha të Roterdamit dhe Antverpit, dy nga portat kryesore të hyrjes së kokainës në Evropë.

Mbi 214 tonelata drogë u sekuestruan në vitin 2020 në kontinentin e vjetër, një rritje me 6 për qind krahasuar me vitin paraardhës dhe sipas ekspertëve, sasia mund të arrijë në 300 tonë këtë vit.

I pranishëm në takim, ministri belg i Drejtësisë Vincent Van Quickenborn, i cili muajin e kaluar u mor në mbrojtje pas zbulimit të një komploti për rrëmbimin e tij, tha se narkotrafiku ka hyrë në një fazë të re.

“Mendoj se kemi hyrë në një fazë të re, e quajtur narko-terrorizëm. Një fazë ku narko-terroristët po përpiqen të destabililzojnë shoqërinë dhe ta mbërthejnë atë. Por ne nuk do ta lejojmë”, deklaroi Van Quickenborn.

Ekspansioni i tregut të kokainës në BE është shoqëruar me një rritje të akteve të dhunës dhe korrupsionit, si dhe me ashpërsimin e konkurrencës mes trafikantëve, gjë që ka çuar në një rritje të vrasjeve dhe kërcënimeve.

LEXONI GJITHASHTU

• Drogë e grabitje, si u bë universiteti grek ‘strofkë’ kriminelësh. Roli i shqiptarit
• Kishte rrëmbyer dhe djalin e gazetarit, e shkuara e shqiptarit që u plagos në Athinë
• Oficerja qëllon me armë zjarri 30-vjeçarin shqiptar në Athinë