Aksident i rëndë në Lezhë–Shkodër, humbin jetën dy persona, zjarrfikësit ndërhynë për nxjerrjen e trupave

Një aksident i rëndë rrugor është regjistruar mëngjesin e kësaj të premte në aksin Lezhë–Shkodër, pranë fshatit Gocaj.

Dy automjete janë përplasur me njëra-tjetrën ndërsa nga burime në vendin e ngjarjes bëhet e ditur se kanë humbur jetën dy persona, konkretisht efektivi i policisë Petrit Florini dhe bashkëshortja e tij Elona ndërsa janë plagosur një grua dhe me dy fëmijët e saj të mitur..

Nga dëshmitë qe vijnë nga vendi i ngjarjes thuhet se forcat zjarrfikëse kanë ndërhyrë duke nxjerrë çiftin e bashkëshortëve Florini pa shenja jete nga një prej automjeteve ndërsa një gruaja dhe dy fëmijët e saj të mitur ndodheshin në automjetin tjetër që drejtohej nga bashkëshorti i saj F.L.

Policia dhe grupi hetimor ndodhen në vendin e ngjarjes dhe po punojnë për të zbardhur shkaqet dhe rrethanat e aksidentit.

Njoftimi i policisë

“Rreth orës 08:00, në aksin rrugor “Lezhë–Mabë”, në vendin e quajtur Gocaj, janë përfshirë në një aksident dy automjete: automjeti me drejtues shtetasin F. L. dhe automjeti me drejtues shtetasin Petrit Florini.

Si pasojë e aksidentit kanë humbur jetën shtetasi Petrit Florini, rreth 53 vjeç, si dhe pasagjerja në këtë mjet, shtetasja Elona Florini, rreth 45 vjeçe, bashkëshortë.

Gjithashtu, janë dëmtuar 3 pasagjerë që ndodheshin në automjetin tjetër me drejtues shtetasin F. L., konkretisht bashkëshortja e tij dhe dy fëmijët e mitur, 6 dhe 2 vjeç, të cilët ndodhen jashtë rrezikut për jetën.

Grupi hetimor vijon punën për sqarimin e plotë të rrethanave të këtij aksidenti”, thuhet në njoftim.