Aksident i rëndë në Varshavë, përplasen dy tramvajë

Një aksident i rëndë la të paktën 23 persona të plagosur pasi dy tramvaje dhe një autobus i transportit publik u përplasën në Varshavë të martën në mëngjes.

Sipas raportimeve, përplasja ndodhi në rrugën Solidarnosci të qytetit rreth orës 7:46 të mëngjesit.

“Dy tramvaje dhe një autobus u përfshinë në aksident. Ka të ngjarë që tramvaji numër 4 të jetë përplasur me autobusin, i cili më pas u përplas me tramvajin në një kalim shërbimi”, tha oficeri i policisë, Witold Urbanowicz.

Ndërkohë, kryebashkiaku i Varshavës, Rafał Trzaskowski, tha në platformë X se prokurorët kishin filluar një hetim për incidentin.

Fotot në mediat sociale të Policisë së Varshavës tregojnë policinë, zjarrfikësit dhe disa ambulanca në vendin e aksidentit .

Trafiku u ndërpre ndjeshëm pas përplasjes, me oficerët e policisë që i drejtuan shoferët në rrugë alternative.

Sipas Autoritetit të Transportit Publik të Varshavës, rruga ishte bllokuar rreth Sheshit Qendror Bankowy të Varshavës, me disa linja tramvaji që u devijuan.