Aksident në aksin Fier–Berat, transportohet me urgjencë një i lënduar

Një aksident automobilistik është regjistruar pasditen e sotme në aksin rrugor Fier–Berat, pranë fshatit Velmish. Një automjet tip “Benz”, me drejtues Josif Shkëmbin, është përplasur me një mjet bujqësor tip “Zetor”.

Si pasojë e përplasjes, drejtuesi i mjetit bujqësor, i identifikuar si Ani Hazizi, ka mbetur i lënduar dhe është transportuar me urgjencë drejt Qendrës Shëndetësore të Roskovecit për të marrë ndihmën e parë mjekësore. Burime bëjnë me dije se ai ndodhet jashtë rrezikut për jetën.

Në vendngjarje kanë mbërritur shërbimet e Policisë dhe grupi hetimor, të cilët po punojnë për zbardhjen e shkaqeve të aksidentit.

Aksi Fier–Berat njihet si një nga pikat problematike, për shkak të aksidenteve të shpeshta, disa prej të cilave kanë pasur pasoja fatale.