Aksident në aksin Mollas-Gostimë, makina përplaset me lokalin! Plagosen 2 persona

Një aksident është regjistruar në aksin rrugor “Mollas-Gostimë” në Elbasan. Policia bën me dije se një makinë ka dalë nga rruga dhe është përplasur me një lokal. Si pasojë janë plagosur dy persona dhe janë shkaktuar dëme në lokal.

Të plagosur kanë mbetur dy personat që ndodheshin në mjet. Policia ka nisur procedimin penal për shoferin 30-vjeçar. Fatmirësisht të plagosurit janë jashtë rrezikut për jetën.

“Drejtoria Vendore e Policisë Elbasan/ Specialistët e Qarkullimit Rrugor referuan materialet në Prokurori ku nisi procedimi penal për shtetasin Q. D., 30 vjeç, pasi në aksin rrugor “Mollas-Gostimë”, automjeti që ai drejtonte ka dalë nga rruga dhe është përplasur me pjesën e jashtme të lokalit të shtetasit R. Ç.. Si pasojë janë shkaktuar dëme materiale në lokal, si dhe janë dëmtuar lehtë 2 shtetase që ndodheshin në këto ambiente.

Gjithashtu, janë dëmtuar drejtuesi i automjetit shtetasi Q. D., dhe pasagjeri në automjetin e tij shtetasi G. Z., 21 vjeç, të cilët janë në kujdesin e mjekëve, jashtë rrezikut për jetën.

Specialistët për Hetimin e Krimeve të Komisariatit të Policisë Cërrik referuan materialet në Prokurori ku nisi procedimi penal për shtetasit: -E. R., 39 vjeç dhe G. J., 44 vjeç, pasi dyshohet se janë konfliktuar fizikisht me njëri-tjetrin në ambientet e një lokali në Cërrik, duke dëmtuar  disa orendi të lokalit;

-A. H., 53 vjeç dhe A. T., 54 vjeç, pasi dyshohet se janë konfliktuar me grushte me njëri-tjetrin në ambientet e një lokali në Belsh, për motive të dobëta. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme”, njofton policia.

LEXONI GJITHASHTU:

• Badge të KQZ të falsifikuara në zgjedhje, Prokuroria Tiranë dërgon në gjyq 3 persona
• Shembje e re në aksin Qukës-Qafë Plloçë, devijohet qarkullimi i automjeteve