Akuzat për Thaçin dhe Veselin, kreu i Veteranëve të UÇK Hysni Gucati: Kjo gjykatë është raciste

Aktakuzat e Prokurorisë Speciale të ngritura për presidentin e Kosovës, Hashim Thaçi dhe kreun e PDK Kadri Veseli ka shkaktuar befasi të madhe në Kosovë, por jo vetëm. Kryetari i Organizatës së Veteranëve të Luftës së UÇK-së, Hysni Gucati, tha për Euronews Albania se këto akuza janë qartësisht politike dhe kanë për qëllim të njollosin veprimtarinë e UÇK-së.

“Ne si organizatë e veteranëve të luftës të UÇK kemi reaguar me kohë për formmimin e kësaj Gjykate Speciale Ndërkombëtare, që s’ka qenë nevoja të formohet fare, dhe kjo gjykatë na është kthyer në bumerang, sidomos krerëve të UÇK. Ne sot papritmas kemi marrë një lajm bombastik për akuzat ndaj zotit Thaçi dhe Veseli. Mendoj se kjo aktakuzë që është ngritur sot pikërisht në këto momente, ku zoti Thaçi do të udhëtonte drejt SHBA për bisedimet, për ne është e papranueshme dhe kryekëput politike”, tha ai.

Në lidhje me pretendimin e Prokurorisë Speciale se Thaçi dhe Veseli kanë punuar për frenimin e punës së kësaj gjykate, z. Gucati tha se kjo është e pavërtetë.

“Unë nuk e besoj se Thaçi dhe Veseli kanë punuar në këtë drejtim për shfuqizimin e kësaj gjykate, kur zoti Thaçi ka qenë iniciator i kësaj gjykate që është formuar bashkë me LDK, kur ishin në koalicion. Kjo është një thënie e pavërtetë. Unë mendoj se Gjykata Speciale po minon dialogun Kosovë-Serbi. Unë mendoj se këto janë të fabrikuara. Nuk mendoj se asnjë pjesëtar i UÇK, që ta ketë atë mundësi që të vrasë mbi 100 persona. Besoj se këto akuza janë ngritur me qëllime politike. Kjo gjykatë është raciste. Kjo gjykatë është e njëanshme, është vetëm ndaj UÇK dhe jo ndaj etnive të ndryshme. Ne si organizatë e dënojmë ashpër.  Kjo është e papranueshme”, tha ai.

Duke komentuar këtë aktakuzë, juristi Tomë Gashi u shpreh në ”llva Now” se Gjykata Speciale është kundër interesit shqiptar. Ai tha se pas akuzave, Presidenti i Kosovës, Hashim Thaçi duhet të japë dorëheqjen dhe të provojë pafajësinë e tij para kësaj gjykate.

“Publikimi emrave të të akuzuarve, sipas meje është e qëllimshme. Gjykata Speciale është gjykatë raciste dhe është kundër shqiptarëve. Në këtë aktakuzë kemi dhe 9 pjesëtarë të tjerë të akuzuar, por emrat e tyre nuk i dimë sepse nuk janë bërë publike”, theksoi ai.

Lexoni gjithashtu: 

Prokuroria Speciale e Kosovës akuzon Thaçin dhe Veselin si përgjegjës për 100 vrasje

Akuzat ndaj Thaçit për krime lufte, Meta: Besojmë në pafajësinë e luftëtarëve të UÇK-së

Hashim Thaçi anulon pjesëmarrjen në takimin për dialogun në Shtëpinë e Bardhë