Albana Vokshi: PD rrezikon përçarjen, por ne e kemi betejën me Edi Ramën

Kryetarja e Komisionit të Shëndetësisë, Albana Vokshi denoncon bojkotimin që mazhoranca i ka bërë mbledhjes së parë të komisionit që ajo drejton.

Znj. Vokshi gjatë një interviste për Euronews Albania tha se ky veprim ka ardhur për shkak se nuk duan të përballen me problemet në sektorin e shëndetësisë.

Deputetja e Partisë Demokratike u shpreh se veprimet e mazhorancës nisen nga interesa të ngushta, të oligarkëve dhe lidhjeve okulte dhe jo të interesit të qytetarëve.

Si justifikim për bojkotin, znj. Vokshi tha se është përdorur pandemia duke kërkuar që mbledhja të zhvillohet online.

“Mazhoranca kërkon zhvillimin e mbledhjes së komisioneve online ndërkohë që zyrtarë të saj zhvillojnë çdo ditë takime më shkelje të rregullave kundër COVID-19. Organizohen koncerte gala. Pse Edi Rama mund ta mbledhë qeverinë dhe unë nuk mbledh dot komisionin? Ata duan të na pengojnë nuk duan të përballen tani me çështje të prekshme”, tha znj. Vokshi.

Deputetja e opozitës iu referua një raporti të fundit të Komisionit Evropian duke thënë se niveli i vdekshmërisë në Shqipëri është më i larti në Evropë.

Për debatet brenda PD, Albana Vokshi pranoi se partia kryesore në opozitë po kalon një moment të vështirë. Ajo uroi që të tejkalohet debatet e brendshme dhe fokusi të jetë tek kundërshtari, mazhoranca e majtë.

“Ky [Edi Rama] është armiku i vërtetë. Ne e kemi betejën me Edi Ramën. Edi Rama është kundërshtari më i madh i të gjithë demokratëve në Shqipëri. Debati në PD duket të ekzistojë, nëse është debat konstruktiv. Debatet konstruktive çojnë në zhvillim. PD është partia më demokrate në vend. A kemi qenë ndonjëherë në situatë kaq të vështirë? Unë mendoj që jo. A rrezikojmë përçarje? Sigurisht që rrezikojmë. A janë konfuze strukturat e PD? Po janë”, deklaroi znj. Vokshi.