Albin Kurti uron kryeministrin Rama për fitoren e zgjedhjeve

Kryeministri i Kosovës, Albin Kurti ka uruar homologun e Shqipërisë për fitoren e aritur në zgjedhjet e 25 prillit.

Ai thotë se Kosova dhe Shqipëria nuk mund të ecin dot përpara nëse nuk bashkëpunojnë me njëra-tjetrën në shumë sektorë.

“Sipas rezultateve paraprake të shpallura nga KQZ në Republikën e Shqipërisë, Partia Socialiste dhe kryeministri Edi Rama ka fituar zgjedhjet parlamentare. Kosova nuk mundet pa Shqipërinë e Shqipëria nuk mundet pa Kosovën, prandaj e përgëzoj kryeministrin e Shqipërisë Edi Ramën për rezultatet, dhe uroj që së bashku, si shqiptarë, të shtojmë bashkëveprimin mes nesh në të gjithë sektorët, si dhe t’i afrojmë standardet evropiane sa i përket demokracisë, zhvillimit ekonomik, drejtësisë e mirëqenies”, tha ai.

Ai madje listoi një kërkesë konkrete për institucionet shqiptare, ndërsa tha se duhen të sqarohen pa humbur kohë pretendimet e ngritura nga subjektet garuese mbi “prekjen e votës”.

“Njëkohësisht uroj që institucionet në Shqipëri të sqarojnë çdo paqartësi në lidhje me procesin zgjedhor që askujt të mos i preket e drejta e votës, mbi të cilën themelohet demokracia përfaqësuese. Këto janë pritshmëritë e shqiptarëve, andaj, të punojmë së bashku”, shkruan më tej Albin Kurti.