Aleancë kundër Perëndimit, Putin në samitin e BRICS: Po ulim vartësinë nga dollari

Liderët e vendeve të grupimit BRICS po mbajnë samitin treditor në Afrikën e Jugut, në përpjekje për të sfiduar dominimin e Perëndimit në çështjet globale.

Një nga mungesat kryesore në këtë samit është ajo e presidentit të Federatës Russe, Vladimir Putin, i cili është objekt i një urdhër-arresti ndërkombëtar për krime lufte në Ukrainë.

Ministri i Jashtëm Sergey Lavrov e përfaqëson atë, por në një mesazh të regjistruar, Putin përshëndeti krijimin e Bankës së Re të Zhvillimit, një alternativë ndaj institucioneve financiare perëndimore dhe rënien e vartësisë nga dollari amerikan.

“Objektivi dhe procesi i pakthyeshëm i shkëputjes së vartësisë nga dollari po arrin momentin kulmor. Bashkë po bëjmë përpjekje për zhvillimin e mekanizmave efikase për bashkëpunim dhe për kontrollin monetar e financiar. Si rezultat i kësaj, rëndësia e dollarit në operacionet e eksport-importit në radhët e BRICS po bie”, deklaroi Putin.

Gjatë zhvillimit të samitit, liderët e vendeve pjesëmarrëse do të diskutojnë edhe mundësinë e zgjerimit të grupimit.

Vendet e BRICS, me një popullsi prej 3 miliardë banorësh, ndodhet përpara vendeve të grupimit perëndimor G7 sa i takon fuqisë blerëse, përkatësisht me 31.5 kundrejt 30 për qind e parashikuar për vitin 2023.

LEXONI GJITHASHTU:

• “Sytë” e Ukrainës, njësia speciale që drejton dronët për operacione zbulimi
• Anija kozmike ruse Luna-25 përplaset në Hënë