Alibeaj: Më 25 prill, do marrim vota ndoshta edhe më shumë se sa meritojmë

Anëtari i Kryesisë së Partisë Demokratike, Enkelejd Alibeaj thotë se, partia ku ai bën pjesë nuk duhet të përsërisë gabimin e bërë në zgjedhjet e kaluara parlamentare sa i takon përzgjedhjes së kandidatëve për deputetë.

Alibeaj duke folur në studion e “Ilva Now”, u shpreh se, duhen vendosur filtra të fortë vetingu politik për emrat, ndërsa u shpreh i sigurt për arritjen fitores nga koalicioni opozitar. Ai tha se, beson tek fitorja nisur nga fakti se edhe në zgjedhjet e vitit2017, nëse koalicioni opozitar do të kishte garuar i bashkuar do të arrinte të formonte mazhorancë.

“Që në 2017 ishim shumicë pavarësisht lojës së koalicioneve dhe që rezultoi ndryshe. Mbi të gjitha për të qenë dhe i sinqertë e shoh të komshinjtë, te kafeneja e lagjes, kudo ka njëlloj zemërimi, njëlloj neverie, makthi që kërkojnë t’i japin fund. Edhe unë atë po them se data 25 prill është një mundësi për të thënë fjalën e tyre të gjitha ata që duan të rrëzojnë këtë regjim”, tha Alibeaj.

Sipas ish-deputetit të PD-së frika e humbjes shihet qartë tek mazhoranca aktuale pasi që pas marrëveshjes politike me ndërmjetësimin e ndërkombëtarëve nisi të ndryshonte Kushtetutën dhe të flitej për ndalimin e koalicioneve parazgjedhore.

“Që kur pretendojnë 74 mandate do të thotë se je duke u zvarritur. Nuk e shoh më si një përballje të pastër politike por si një përplasje midis shoqërisë dhe një individi të vetëm. Pas 5 qershorit filloi të ndryshonte fjalën e dhënë, ndryshimin e kushtetutës, koalicionet, çështje që kurrë nuk kishin pasur problem”, tha Alibeaj.

Anëtari i kryesisë së PD shtoi më tej se pret që kryeministri, Edi Rama të bëjë ç’është e mundur për t’i futur pyka opozitës me anë të truqeve ligjore, por sipas tij përmbysja do të vijë për shkak të frymës.

“Jam i sigurt që koalicioni opozitar nuk është vetëm koalicion aritmetik, por edhe frymë. Do të marrim vota ndoshta edhe të mos merituara nga ana jonë por thjesht nga zemërata”, u shpreh Alibeaj.

Ai deklaroi më tej se, tashmë duket sikur mazhoranca po tërhiqet nga kërkesa për të hapur listat e kandidatëve për deputetë, ndërsa shtroi se kërkesa e opozitës është për hapjen e tyre 100%.