Ambasada amerikane reagon pas vizitës së 2 zyrtarëve të SHBA-së

“Rikonfirmuan mbështetjen e SHBA-së për anëtarësimin e Shqipërisë në BE dhe nxitën vijimin e reformave të nevojshme, përfshirë reformën në drejtësi”.

Kështu shkruhet në reagimin e ambasadës amerikane në Tiranë për vizitën e Ndihmës Sekretares së Shtetit për Çështjet Europiane dhe Euroaziatike Karen Donfried dhe Zëvendës Ndihmës Sekretari i Shtetit dhe për të Dërguarin e Posaçëm për Ballkanin Perëndimor Gabriel Escobar në Shqipëri më 28 dhe 29 prill.

“Ata rikonfirmuan mbështetjen e Shteteve të Bashkuara për anëtarësimin e Shqipërisë në Bashkimin Europian dhe nxitën vijimin e reformave të nevojshme, përfshirë reformën në drejtësi; mirëpritën përpjekjet e fundit për të diversifikuar burimet, furnizimet dhe rrugët e energjisë në Shqipëri dhe më gjerë në rajon; dhe nënvizuan se Shtetet e Bashkuara do të vazhdojnë luftën kundër korrupsionit si një interes thelbësor i sigurisë kombëtare të Shteteve të Bashkuara”, thuhet në reagim.

Ambasada nënvizon se zyrtarët e lartë amerikanë theksuan gjithashtu rolin e pazëvendësueshëm të një opozite të fortë në demokracinë e Shqipërisë.

“Ata theksuan gjithashtu rolin e pazëvendësueshëm të një opozite të fortë në demokracinë e Shqipërisë, theksuan rëndësinë e institucioneve të forta demokratike dhe sundimit të ligjit dhe shprehën shpresën për një partneritet të efektshëm dhe që sheh përpara me popullin shqiptar, duke përfshirë edhe partitë që i përfaqësojnë ata”, thuhet në njoftim.

LEXONI GJITHASHTU:

• Rama pas takimit me Donfried: SHBA-të mbështesin e Ballkanin e Hapur
• Alibeaj: SHBA-të mbështesin një PD proamerikane që sheh nga e ardhmja