Ambasada e Suedisë: Lufta kundër korrupsionit vendimtare për integrimin në BE

Ambasada e Suedisë në Tiranë ka reaguar pas vendimit të parlamentit, i cili votoi kundër kërkesës së SPAK për arrestimin e Belinda Ballukut.

Përmes një postimi në faqen e saj zyrtare në Facebook, Ambasada thekson se përparimi i Shqipërisë drejt integrimit në Bashkimin Evropian varet nga lufta kundër korrupsionit në nivelet më të larta.

Në reagim thuhet se Suedia pret që sistemi i drejtësisë në Shqipëri të veprojë me shpejtësi dhe pa pengesa, ndërsa udhëheqja politike shqiptare të mbetet përgjegjëse për garantimin e vijimësisë së këtij procesi.

Reagimi i plotë

“Suedia mbështet integrimin e Shqipërisë në Bashkimin Evropian, në përputhje me dëshirat e popullit shqiptar. Një kërkesë kyçe për përparimin në këtë proces të bazuar në meritë është ndjekja efektive penale e korrupsionit, përfshirë edhe në nivelet më të larta. Presim qartë që, në raste të tilla, sistemi i drejtësisë do të jetë në gjendje të vazhdojë shpejt dhe pa pengesa. Udhëheqja politike shqiptare mbetet përgjegjëse për sigurimin e këtij procesi”, thuhet në reagim.