Ambasadori amerikan në Beograd: Angazhimi i Vuçiçit për targat është konstruktiv

Ambasadori i SHBA-së në Serbi, Christopher Hill tha se ka pasur një bisedë shumë të mirë me presidentin Aleksandër Vuçiç, për bisedimet mes Beogradit dhe Prishtinës që u mbajtën të hënën në Bruksel.

Hill vlerësoi angazhimin konstruktiv të Vuçiçit, duke shprehur shpresën se do të gjendet një zgjidhje për problemin e targave në Kosovë, shkruan N1.

“Kam pasur një bisedë shumë të mirë me presidentin Vuçiç për procesin e Brukselit. E inkurajova presidentin Vuçiç që të vazhdojë përfshirjen e tij konstruktive në proces, me shpresën se do të gjejmë një zgjidhje. Në fund, të dyja palët do të duhet të përfshihen, por një qasje konstruktive është ajo e duhura.

Kam besim të plotë kur njerëz me përvojë si përfaqësuesi i lartë i BE, Josep Borell dhe Miroslav Lajçak po punojnë për këtë çështje, se mund të arrihet një zgjidhje”, u tha Hill gazetarëve para Pallatit të Serbisë, pas takimit me Vuçiç.

Presidenti i Serbisë, Aleksandër Vuçiç, pas takimit me ambasadorin amerikan, ka njoftuar në Instagram se ka ndarë shqetësimin e tij për sigurinë e serbëve në Kosovë.

“Falënderova SHBA-në për përfshirjen e tyre në qetësimin e tensioneve dhe parandalimin e përshkallëzimeve të mëtejshme, dhe theksova se Serbia mbetet sinqerisht e përkushtuar ndaj dialogut dhe zgjidhjes së të gjitha çështjeve të hapura në mënyrë paqësore, në mënyrë që të ruhet paqja dhe stabiliteti i fituar me vështirësi në të gjithë rajonin”, theksoi ai.

LEXONI GJITHASHTU

• Kalon në Bruksel propozimi për liberalizimin e vizave për Kosovën në janar të 2024-s
• Albin Kurti nuk ka arritur asnjë sukses në politikën e jashtme, thotë gazetari
• Digjet një automjet me targa serbe në veri të Mitrovicëschris