Ambasadorja e SHBA takim me Lulzim Bashën në selinë e PD

Një ditë para mbajtjes së zgjedhjeve, ambasadorja amerikane vizitoi sërish zyrën e kreut të opozitës, Lulzim Basha. Diplomatja amerikane Yuri Kim qëndroi për rreth 40 minuta në selinë e Partisë Demokratike.

Nga burime brenda PD-së mësohet se ambasadorja Kim kërkoi nga partia më e madhe opozitare të kontribuojë për një ditë të qetë dhe një proces zgjedhor korrekt. Qytetarët duhet të jenë plotësisht të lirë të ushtrojnë të drejtën e tyre të votës sipas vullnetit të tyre.

Ambasadorja e SHBA vazhdimisht ka bërë thirrje për drejtuesit e subjekteve politike që të shmangin retorikën dhe gjuhën e urrejtjes gjatë fushatës, ndërsa vazhdimisht ka kërkuar që të mos kandidohen persona me të kaluar të dyshimtë për zgjedhjet e 25 prillit.