Ambasadorja Kim përgjigje kritikëve pas takimit me Bashën: Kush e vendos SHBA kundër shqiptarëve, e ka gabim

Ambasadorja Yuri Kim në një deklaratë për mediat pas takimit me kryedemokratin Lulzim Basha tha se Uashingtoni mbetet i angazhuar për të punuar më ngushtësisht me Partinë Demokratike.

Ambasadorja u shpreh se SHBA është e vendosur të godasë korrupsionin, pavarësisht rangut, nivelit apo partisë.

“Dëshiroj të konfirmoj se për sa i përket Uashingtonit, ne jemi tepër seriozë në luftën kundër korrupsionit, luftën kundër pandëshkueshmërisë, ne jemi të gatshëm të sulmojmë atë pavarësisht ku ndodhet, pavarësisht rangut, nivelit apo partisë”, tha ambasadorja Kim.

Ajo iu përgjigj kritikave për ndërhyrje në sovranitetin e Shqipërisë, duke shtuar se SHBA kanë qenë dhe do vijojnë të jenë në mbrojtje të vendit tonë.

“Kam parë disa raportime shqetësuese sipas të cilave ajo që ka ndodhur në lidhje me përcaktimin nga Departamenti i Shtetit, qenka një lloj sulmi ndaj sovranitetit të Shqipërisë. Është diçka faktikisht e gabuar dhe është ofenduese. Do doja t’i kujtoja cilitdo që më 6 maj 1919, kur e gjithë bota donte që Shqipëria të shuhej, presidenti Wilson tha se Shqipëria do të qëndrojë. Ata që synojnë t’i vendosin SHBA kundër popullit shqiptar, do t’iu them se e keni gabim. Populli shqiptar e di që ju e keni gabim. Pozita jonë sa i përket sovranitetit të Shqipërisë nuk ka ndryshuar, pozita jonë sa i përket PD nuk ka për të ndryshuar”, u shpreh ambasadorja e SHBA.

LEXONI GJITHASHTU:

• Yuri Kim përcakton prioritet reformën zgjedhore dhe territoriale: Duhet PD e fortë