Ambasadorja Kim përgëzon marrëveshjen Shqipëri-Greqi për pikë të përbashkët të sigurisë kufitare

Ambasadorja Yuri Kim përgëzoi mbrëmjen e së hënës Shqipërinë dhe Greqinë për nënshkrimin e një marrëveshjeje që shton bashkëpunimin për të garantuar sigurinë ndër-kufitare.

“Marrëveshja e sotme midis Shqipërisë dhe Greqisë për forcimin e bashkëpunimit kufitar është një zhvillim pozitiv. Një kontroll më i mirë i kufijve forcon sigurinë e dy vendeve dhe rajonit,” – shkroi Ambasadorja Kim në Twitter.

“Është mirë të shohësh miqtë të punojnë së bashku për të zgjidhur problemet e përbashkëta,” – shtoi ajo më tej.

Today’s agreement btwn ?? & ?? to strengthen border cooperation is a positive development. Better border control strengthens the security of both countries and the region. Good to see our friends working together to solve shared problems. @USEmbassyAthens @StateEUR @StateINL https://t.co/h2qNNLYcyi

— Ambassador Yuri Kim (@USAmbAlbania) January 18, 2021

Në Twitter-in e saj, Kim kishte etiketuar byronë qeveritare të çështjeve të Evropës dhe Eurozisë (DoS Europe & Euroasia), byronë qeveritare të çështjeve të Zbatimit të Ligjit dhe Narkotikëve Ndërkombëtar (INL) si dhe ambasadën amerikane në Athinë. Me këto etiketime Kim nënkuptoi se marrëveshja mes dy vendeve ishte rezultat i negocimit të departamentit amerikan.

Shqipëria dhe Greqia nënshkruan sot marrëveshje që i hap rrugë ngritjes së një qendre të përbashkët të sigurisë policore dhe doganore, qendër e cila do të ngrihet në anën greke të kufirit dhe do të ketë personel nga të dyja vendet.

Marrëveshja u nënshkrua nga dy zëvendësministrat e brendshëm të vendeve përkatëse Julian Hodaj dhe Elefterios Ikonomu.

Pika e përbashkët e sigurisë parashikohet të shkurtojë kohën e përcjelljes së informacioneve dhe do të rrisë efektshmërinë e luftës ndaj krimit ndërkufitar si trafiku i drogës apo kalimi i paligjshëm i kufirit.