Amnistia fiskale do favorizonte botën e krimit, thotë Meta

Kryetari i Partisë së Lirisë, Ilir Meta thotë se amnistia fiskale, e propozuar nga kryeministri Edi Rama, ka për qëllim të favorizojë botën e krimit.

Në një deklaratë për mediat, Meta u shpreh se amnistia do kriminalizonte ekonominë dhe shoqërinë shqiptare.

“Kjo iniciativë e kryeministrit aktual, do favorizonte qartësisht botën e krimit, duke iu ofruar mundësi që të ardhurat e përfituara ndër vite për aktivitetin kriminal nga grupe të organizuara, të pushtojnë ekonominë vendase dhe veçanërish tregun financiar në mënyrë të ligjshme. Do goditej drejtpërdrejtë biznesi  indershëm dhe iniciativa e ndershme, do kriminalizohej e gjithë ekonomia dhe shoqëria shqiptare”, theksoi ai.

Shefja e Fondit Monetar Ndërkombëtar (FMN), Yan Sun deklaroi se Shqipëria nuk është ende gati për të bërë amnistinë fiskale.

Gjatë një konference të përbashkët për shtyp në Tiranë me ministren e Financave dhe Ekonomisë, Delina Ibrahimaj dhe guvernatorin e Bankës së Shqipërisë Gent Sejko, Sun u shpreh se projektligji mund të konsiderohet si një dëmtim për moralin tatimor.

Sipas saj, qeveria duhet të ndryshojë projektligjin e amnistisë në një program të vetëdeklarimit vullnetar, dhe për ta bërë këtë duhet të ketë një sistem modern të administratës tatimore.

LEXONI GJITHASHTU

• FMN kundër amnistisë fiskale, Balla: Do miratojmë projektligjin
• FMN-ja për amnistinë fiskale: Qeveria të ndryshojë projektligjin
• Sejko: Inflacioni do të mbetet i lartë gjatë muajve në vijim