Analistët: Chollet me mesazhe të qarta për dialogun me Serbinë

Të mërkurën Kosova priti zyrtarin e lartë të Departamentit Amerikan të Shtetit, Derek Chollet. 

Sipas analistit Leart Hoxha, zyrtari amerikan pati mesazhe të qarta për dialogun me Serbinë e në veçanti për asociacionin e komunave me shumicë serbe. 

“Vlerësimi i Uashingtonit është se situata është kritike, ky është termi me të cilin janë duke operuar në Uashington dhe thuhet se urgjenca për themelim të asosacionit është nënvizuar,” – u shpreh ai.

Sipas tij, takimet e lidershipit kosovar me amerikanin nuk ishin të lehta nëse merret parasysh gjuha e përdorur. Megjithatë, Hoxha shton se mori edhe garanci të forta kur bëhet fjalë për asociacionin dhe kompetencat që do të ketë. 

Me këtë pajtohet edhe analisti Gazmir Raci. 

“Marrëveshja për asosacionin duhet të arrihet dhe asosacioni nuk është një Republika Sërpska në Kosovë,” – tha ai.

Por, ai nuk pajtohet se ndaj Kosovës pati gjuhë të ashpër nga amerikani, pasi sipas Racit Kosova ka pozicion më të mirë krahasuar me Serbinë për shkak të zhvillimeve të kohëve të fundit.

Zyrtari i lartë amerikan Derek Chollet, pas Prishtinës, ku pati takime me liderët institucional, ata opozitar e të pakicave, por edhe me përfaqësues të shoqërisë civile e mediave, ka udhëtuar në Beograd. Temë kryesore edhe atje pritet të jetë dialogu me Kosovën. 

LEXONI GJITHASHTU:

• Bërnabiç: Do i kërkojmë Chollet të na premtojë se asosacioni nis në janar
• Chollet viziton nesër Shkupin: Lufta kundër korrupsionit hap rrugën drejt BE