Chollet viziton nesër Shkupin: Lufta kundër korrupsionit hap rrugën drejt BE

SHBA inkurajon Maqedoninë e Veriut që të përgatisë dhe votojë ndryshimet kushtetuese që janë parakusht për vazhdimin e procesit të integrimit të shtetit në BE.

Ambasadorja amerikane në Shkup, Angela Ageler vlerëson se ky proces është i rëndësishëm për të çuar para procesin euro-integrues bashkë me reformat dhe luftën lundër korrupsionit.

“I inkurajojmë funksionarët e zgjedhur të këtij vendi të veprojnë në interes të qytetarëve dhe të veprojnë sa më parë, të bëjnë ndryshimet e duhura që do të mundësojnë hapjen e negociatave drejt BE-së. E dimë se janë vendime të vështira për këtë vend. Ne do të mbështesim gjithçka që do të iu afrojë drejt BE-së”, u shpreh ajo.

Të mërkurën, këshilltari i Departamentit Amerikan të Shtetit Derek Chollet do ta vizitojë Maqedoninë e Veriut, ndërsa pritet që me vete të sjellë një listë të zyrtarëve të korruptuar bazuar në gjetjet e ekipit amerikan special të hetuesve të korrupsionit që gjatë fundit të vitit të kaluar qëndroi në Maqedoninë e Veriut.

Për ministrin e Jashtëm, Bujar Osmani, nëse ndodh, është pozitive për vendin.

“Dialogu strategjik me SHBA-në është kornizë bashkëpunimi dhe në të është edhe lufta kundër korrupsionit. Është një platformë që e kemi dakorduar bashkë dhe çdo mbështetje që ata japin është e mirëseardhur. Deri tani na ofruan mbështetje financiare apo ekspertizë, ndërsa ja tani kemi paralajmërim edhe për një listë sanksionesh. Kjo është e mirëseardhur dhe në interes të Maqedonisë së Veriut”, theksoi Osmani.

Ambasadorja amerikane në RMV ka paralajmëruar luftë pa kompromis ndaj korrupsionit të funksionarëve të lartë ndërsa këtë gjë e ka thënë edhe i dërguari special për Ballkanin Perëndimor Gabriel Eskobar.

Të fundit që u gjetën në listën e zezë amerikane ishin ish kryeministri Nikolla Gruevski dhe ish shefi i policisë sekrete Sasho Mijallkov.

LEXONI GJITHASHTU

• DASH: Derek Chollet viziton Kosovën më 11 janar
• Kurti: Nuk jap garanci për kriminelët që janë në listën e zezë të SHBA-ve
• Kurti: Na duhen trupa shtesë të NATO-s për shkak rritjes së bashkëpunimit Serbi-Rusi