Analisti quan paradoks shqiptar votën ‘pro’ qeverisë pavarësisht perceptimit si të korruptuar

Për analistin Ermal Hasimja ka një paradoks të madh mes qytetarëve shqiptarë për sa i përket perceptimit të tyre për korrupsionin dhe qëndrimit se kë votojnë ditën e zgjedhjeve.

Duke komentuar rezultatet e Barometrit, ku 92% e të pyeturve mendojnë se qeverisja është e zhytur në korrupsion, Hasimja tha se “shifrat janë skandaloze”, por ai tha se problemi kryesor është te mos-përputhja mes këtij gjykimi dhe vendimit për të votuar të njëjtën qeveri.

“Të vjen të pyesësh veten, kush dreqin i voton këta njerëz që qenkan kaq të korruptuar, është pyetje që duhet t’ia bëjë vetes çdo shqiptar dhe duhet t’ia kishte bërë që përpara zgjedhjeve,” – u shpreh Hasimja.

Në komentin e tij Hasimja tha se nga sondazhi mund të kuptohet se qytetarët nuk e kanë më problem korrupsionin në qeverisje. Ai këmbënguli se korrupsioni nuk mund t’i vishet si përgjegjësi qytetarëve, pasi në fillim përgjegjësia bie te qeveria.

Hasimja tha se korrupsioni nuk po konceptohet në shumicë dërrmuese si problem moral apo etik.

“Ke plot njerëz që thonë, hë se kështu funksionon kjo gjë, ka korrupsion gjithandej,” – tha Hasimja duke shtuar se vetëm kur korrupsioni të kthehet problem moral dhe etik ai do të luftohet dhe kundërshtohet në masë.

LEXONI GJITHASHTU:

• 92% e shqiptarëve mendojnë se qeverisja është e zhytur në korrupsion