Redi Shehu: Në 2005 PD fitoi me kartën morale “duar të pastra”, pas aleancës me LSI, u bënë duar të pista

Analisti Redi Shehu tha për PD-në se partitë e vogla më shumë i kanë prishur punë se sa e kanë mbështetur që të ecë përpara si parti.

Në studion e Euronews Albania, z. Shehu tha se në vitin 2017, LSI i mori votat nga të demokratët e zhgënjyer dhe pragmatistë, të cilët zgjodhën LSI-në pasi me anë të saj mund të siguronin punë.

“LSI-ja fitoi në 2017 më shumë për shkak se si PD menaxhoi marrëveshjen me Ramën. Mund t’i quajmë pragmatistë këta demokratë të zhgënjyer që shkuan te LSI-ja pasi të garanton punë”, tha z. Shehu.

Redi Shehu përmendi se zgjedhja që PD dhe LSI të mos kandidojnë bashkë ishte ajo e duhura, pasi PD-në dhe LSI-në nuk i bashkon diçka ideologjikisht, ndërsa LSI-ja vetëm e dëmton PD-në.

“Unë them që nuk ka sens që brenda listës së PD të futej LSI. Nuk ka çështje ideologjike që i bashkojnë, vetë PD e shikonte LSI-në si diçka që të gërryen nga brenda”, u shpreh analisti, duke shtuar se partitë e vogla me lider të përjetshëm të cilat kanë kusuret e veta që në aspektin e imazhit dhe frymës demokratike, më shumë i kanë bërë dëm PD-së.

Analisti Shehu përmendi se PD-ja fitoi me kartën morale në vitin 2005, kartë e cila e humbi vlerën për shkak të bashkëpunimit PD – LSI. Pas këtij bashkëpunimi, sipas z. Shehu PD-ja e pati të vështirë të shkëputej nga pushteti.

“Në 2005 Berisha fitoi me kartën morale “duar të pastra”, mirëpo duart e pastra pas aleancës me LSI-në u bënë duar të pista dhe aty pushteti na pëlqeu jashtë mase sa bëmë edhe 21 janarin që të mos e lëshonim pushtetin”, u shpreh analisti.