Andi Bushati: Për sa kohë qeveria e Albin Kurtit ka këtë qasje, unë do ta mbështes

Analisti Andi Bushati ka shprehur hapur mbështetjen ndaj Vetëvendosjes në Kosovë për qasjen që ka pasur kjo e fundit ndaj dialogut me Serbinë.

Në emisionin “Shock” me Bruna Çifligun në Euronews Albania, Bushati mbrojti qëndrimin e tij kundër idesë për krijimin e asociacionit të komunave serbe në Kosovë.

Ai theksoi se kundërshtia ndaj asaj pike ka qenë në kuadër të qëndrimit që “Serbisë nuk i duhet dhënë më gjë” dhe që sipas tij deri më sot, si parti politike në Kosovë e ka mbajtur vetëm Vetëvendosje.

“[Asociacioni] Ishte brenda së njëjtës logjikë që duhet t’i japim akoma diçka Serbisë, vazhdoj të qëndroj në pozita maksimaliste dhe them që periudha që Serbisë i duhet dhuruar diçka për të vazhduar dialogun ka përfunduar, për sa kohë qeveria e Vetëvendosjes do të ketë këtë qasje, unë do ta mbështes, kur të bëhet si këta të tjerët, nuk do ta mbështes më, është kaq e thjeshtë,” – tha Bushati.

Gjatë emisionit “Shock”, Bushati pati replika të vazhdueshme me Baton Haxhiun. Ky e konsideroi zhvillimin e fundit mes Kosovës dhe Serbisë “tradhëti” dhe “poshtërim” nga ana e qeverisë së Albin Kurtit, pasi “i dhuroi veriun Serbisë”.