Andi Bushati: Tezat e shpalosura nga Berisha po zënë vend te mbështetësit e PD

Analisti Andi Bushati thotë se mbështetja për ish-kreun e Partisë Demokratike, Sali Berisha pasi u përjashtua nga grupi parlamentar ka ardhur në rritje.

Në studion e “Shock”, z. Bushati thotë se në takimet në kuadër të “Foltores” vihen re një pjesëmarrje shumë e lartë e militantëve të Partisë Demokratike.

“Kurba në këto dy javë e Sali Berishës është në ngritje. Ku e shoh këtë ngritje, e para e shoh në pjesëmarrje. Takimi i djeshëm në Durrës, më shumë ishin jashtë se brenda sallës”, tha ai.

Sipas tij, tezat e shpalosura nga Sali Berisha po zënë vend tek grupi i ngushtë i mbështetësve të PD-së.

“Kemi një rritje, na pëlqen apo s’na pëlqejnë ne, tezat e Sali Berishës po zënë vend tek militantët e PD, jo ke popullsia e gjerë”, tha ai.

Ish-kryeministri Sali Berisha është shprehur se nisma e tij synon të rikthejë Partinë Demokratike në ato vlera, mbi të cilat u themelua tri dekada më parë.