Garda Kombëtare e Teksasit mbërrin në Illinois, pritet dislokimi

Anëtarët e Gardës Kombëtare të Teksasit mbërritën mbrëmë në Qendrën e Trajnimit të Rezervës së Ushtrisë Amerikane në Ellwood, në jugperëndim të Çikagos, ku do t’i nënshtrohen trajnimit përpara se të caktohen për të mbrojtur objektet federale dhe zyrtarët e Imigracionit dhe Doganave (ICE).

Burime të njohura me operacionin i thanë CBS News se rreth 200 ushtarë do të vendosen në Çikago sot, pas një informimi mbi operacionin, ndërsa një seancë dëgjimore mbi një padi nga shteti i Illinois dhe qyteti i Çikagos, i cili po përpiqet të bllokojë vendosjen, është planifikuar për nesër.

Ushtarë me uniforma të Gardës Kombëtare të Teksasit, kamionë dhe rimorkio që shërbenin si strehim të përkohshëm u panë në fushë në Ellwood, dhe objekti u rrethua me kordon.

Guvernatori i Teksasit, Greg Abbott, konfirmoi vendosjen e trupave, duke postuar një foto të ushtarit me mesazhin “Garda Kombëtare Elite e Teksasit. Gjithmonë gati. Duke u vendosur tani”.

Administrata e Presidentit të SHBA-së, Donald Trump, tha se trupat do të ngarkohen me sigurimin e ndërtesave federale, duke përfshirë qendrat e ICE në periferi të Broadway dhe në qendër të Çikagos.

Megjithatë, zyrtarët shtetërorë dhe lokalë në Illinois thonë se nuk u informuan mbi detajet e misionit.

Guvernatori i Illinois, J. B. Pricker, tha se Trump urdhëroi vendosjen e 400 anëtarëve të Gardës Kombëtare të Teksasit në disa shtete, përfshirë Illinois dhe Oregonin.

LEXONI GJITHASHTU:

• Trump: Hamasi po pajtohet me gjëra shumë të rëndësishme
• Pas deklaratave të Trump dhe Hamas, a ka mbaruar lufta në Gaza?