Ankorimi ende larg, asnjë anije ukrainase me grurë s’ka mbërritur në destinacion

Anija e parë me drithë që la Ukrainën nuk ka mbërritur ende në destinacionin e saj, Tripoli të Libanit, për shkak se nuk është gjetur ende një blerës i ngarkesës prej 26 mijë tonë misër.

Lajmin e ka bërë të ditur ambasadori ukrainas në Liban, Ihar Ostash, përmes një postimi në rrjetin social Facebook.

“Aktualisht jemi në Tripoli, por aksesi në port i anijes së parë me drithëra të nisur nga Odesa do të vonohet”, deklaroi diplomati ukrainas.

Një tjetër anije, “Polarnet”, ka kryer itinerarin e saj dhe ka shkarkuar ngarkesën në Dernicë të Turqisë. Duke folur për mediat, kapiteni i anijes dha detaje mbi udhëtimin e vështirë.

“Tre anijet ndoqën një rrugë të paracaktuar nga Qendra e Përbashkët e Koordinimit. Deri në Stamboll, ato kaluan zona të rrezikshme dhe korridore detare, që vetëm së fundmi ishin pastruar nga minat nënujore”, thotë Ahmet Yucel Alibeyler, kapiten i anijes “Polarnet”.

Anije të tjera janë ende rrugës për në destinacione të ndryshme. Dërgesat janë rezultat i një marrëveshjeje mes Ukrainës dhe Rusisë, të ndërmjetësuar nga Turqia.

Akordi synon të lehtësojë krizën e urisë, që po kërcënon një seri vendesh në mbarë botën.

LEXONI GJITHASHTU:

• Sulmet në Zaporizhia, OKB: Ukraina rrezikohet nga një katastrofë bërthamore
• Tre anije të ngarkuara me grurë pritet të lundrojnë nga porti i Chernomorsk