“Ankthi” i Be e Kinës: Si do ndikojnë në marrëdhëniet me Pekinin zgjedhjet amerikane

BE dhe SHBA bien dakord për një gjë: të sigurohen se Kina nuk do të dominojë tregun për teknologjitë e reja dhe energjinë e gjelbër. Megjithatë, qasja e tyre ndryshon; Uashingtoni mbështet shkëputjen nga marrëdhëniet tregtare, ndërsa Brukseli preferon zbutjen e rrezikut. A është e mundur që zgjedhjet presidenciale amerikane ta ndryshojnë lojën.

 “Nëse Trump vjen në pushtet duhet të presim më shumë tarifa dhe sanksione, si dhe më shumë presion ndaj aleatëve për t’u shkëputur. Por nuk besoj se këto presione do të jenë më të mëdha se administrata Harris. Besoj se ka një konsensus dypartiak sa i takon nivelit të rrezikut që Kina përbën për SHBA”,-tha Dr. Ceren Ergenc, Qendra për Studimin e Politikave Evropiane.

Kokë më kokë, demokratët dhe republikanët do të vijojnë betejën e nisur mes dy ekonomive më të mëdha në botë për kontrollin e prodhimit dhe zinxhirëve të shpërndarjes. Por metodat e tyre do të jenë të ndryshme.

 “Me Harris do të shohim vazhdimin e politikave të Biden, që do të thotë më shumë koordinim, më shumë shkëmbim informacioni dhe më shumë përafrim të politikave, gjë që është si pozitive edhe negative. Pozitive sepse do të kemi një aleat të ngushtë me të cilin të punojmë. Negative sepse kemi parë episode ku SHBA dhe Evropa dështojnë të bien dakord”,- tha Francesca Ghiretti, studiuese, Instituti i kërkimeve RAND.

BE e sheh Kinën si një partner tregtar dhe si rival sistematik. Ndërsa Uashingtoni e sheh si një konkurrent ndaj hegjemonisë së tij në rënie.

Ndaj, ndërsa Amerika kërkon shkëputjen nga Kina, Unioni nuk dëshiron t’i ndërpresë lidhjet me gjigantin aziatik pasi zinxhirët e tyre të furnizimit janë shumë të ndërlidhur.

Megjithatë, blloku me 27 vende i ka ashpërsuar tonet. Ai planifikon të vendosë një taksë shtesë mbi makinat elektrike kineze dhe ka hapur një hetim mbi subvencionet kineze për prodhuesit e paneleve diellore.

 “Në rast të një përshkallëzimi të raporteve SHBA-Kinë, tensioni mes tyre do të bjerë edhe mbi Evropën, që ajo të shkëputet, duke e lënë strategjinë e moderuar të zbutjes së rrezikut në favor të një ndërprerjeje të marrëdhënieve me Kinën, gjë që Evropa s’mund ta përballojë”,-tha Francesca Ghiretti, studiuese, Instituti i kërkimeve RAND.

Të përballura me politikën e paparashikueshme të Donald Trump ndaj Pekinit, BE dhe Kina janë në pritje të zgjedhjeve.

LEXONI GJITHASHTU:

• “Janë ezauruar 47% e vaksinave kundër gripit” Tomini: Interesi vijon të jetë i lartë
• Masakra në Shkodër, Bardhi: Policia është bërë mbrojtëse e krimit, mund ta ndalonte