Apeli i GJKKO lë në fuqi pafajësinë për ish-anëtarin e Gjykatës së Lartë, Shkëlzen Selimi

Gjykata e Posaçme e Apelit për Korrupsionin dhe Krimin e Organizuar (GJKKO) ka shpallur të pafajshëm ish-anëtarin e Gjykatës së Lartë, Shkëlzen Selimi, në çështjen e ngritur ndaj tij për “refuzim për deklarim dhe fshehje pasurie”.

Ky vendim vjen pasi edhe shkalla e parë e kishte shpallur më herët të pafajshëm Selimin, duke mos gjetur prova të mjaftueshme për të mbështetur akuzat e ngritura.

Çështja ishte ankimuar nga Prokuroria e Posaçme (SPAK), e cila kërkoi shqyrtim në Apel të vendimit të mëparshëm, duke këmbëngulur në pretendimet për parregullsi në deklarimin e pasurisë së ish-gjyqtarit.

Megjithatë, trupi gjykues i Apelit të GJKKO-së ka vlerësuar se provat e paraqitura nuk arrijnë standardin e nevojshëm ligjor për të provuar fajësinë, duke lënë në fuqi vendimin e shkallës së parë.

Me këtë vendim, procesi gjyqësor ndaj Selimit konsiderohet i mbyllur në këtë fazë të gjykimit, në mungesë të një ndryshimi të mëtejshëm të situatës nga instancat e larta gjyqësore.