AQSHF dhe Universiteti Politeknik i Tiranës nisin digjitalizimin e arkivave filmike

Arkivi Qendror Shtetëror i Filmit (AQSHF) dhe Universiteti Politeknik i Tiranës (UPT) kanë nisur një projekt të përbashkët me qëllim ruajtjen dhe shpëtimin e materialeve filmike dhe fotografike shqiptare, të rrezikuara nga degradimi dhe kushtet jo të përshtatshme teknike.

Ky bashkëpunim synon ndërhyrjen emergjente për arkivimin, konservimin dhe digjitalizimin e mijëra filmave në formatet 35mm dhe 16mm, si dhe qindra mijëra fotografive historike që kanë qenë të ruajtura jashtë standarteve të duhura dhe rrezikojnë të humbasin.

Akli Fundo, Rektor i Universitetit Politeknik të Tiranës, theksoi rëndësinë e këtij projekti për ruajtjen e historikut të laboratorit të filmit të universitetit.

“Universiteti Politeknik ka pasur një laborator filmi që pasqyronte aktivitetet tona. Ky arkiv na është dorëzuar dhe falënderojmë Arkivin Qendror Shtetëror të Filmit për digjitalizimin dhe ruajtjen e tij në kushte të specializuara.”

Ndërkaq, Eljan Tanini, Drejtor i AQSHF-së, nënvizoi vlerën e kësaj nisme jo vetëm për ruajtjen e trashëgimisë filmike, por edhe për pasurimin e fondit arkivor kombëtar.

“Kjo është një marrëveshje me shumë vlerë, që përveçse përmirëson gjendjen tonë arkivore, do t’i shërbejë edhe shoqërisë shqiptare. Materialet do të digjitalizohen, pastruar dhe do të jenë në shërbim të Universitetit Politeknik. Ky bashkëpunim do të vijojë edhe me arkiva të tjera.”

Materialet që do të trajtohen përfshijnë dokumentime të rëndësishme të jetës sociale, kulturore dhe shkencore shqiptare, të cilat kanë qenë të ruajtura për dekada jashtë standarteve, duke rrezikuar të humbasin.

Ky projekt shënon një hap të rëndësishëm drejt mbrojtjes së kujtesës vizuale kombëtare.