Armand Duka rizgjidhet president i FSHF-së

Armand Duka është rizgjedhur në krye të Federatës Shqiptare të Futbollit, për një mandat të gjashtë drejtues. Duka mposhti në këtë garë dy kandidatët e tjerë, Sulejman Starova dhe Dritan Shakohoxha.

Duka u rizgjodh me shumicë votash në Asamblenë e Përgjithshme teksa nga 43 votues, fitoi 37 vota, kundër vetëm katër votave që mori Starova ndërsa nuk pati asnjë votë pro Shakohoxhës, ndërsa dy vota ishin të pavlefshme për gabime teknike.

Pas rizgjedhjes, Duka tha se është koha t’i lemë pas ato çfarë kemi kaluar gjatë dy muajve. Ai u zotua se dhe ato zëra që kanë qene kundër kandidaturës së tij do të dëgjohen për të përmirësuar gjendjen aktuale të futbollit shqiptar.

“Jam i emocionuar dhe i obliguar për këtë votëbesim. Secili mund të ketë vërejtje për mua, por do t’i respektoj dhe do të mundohem t’i korrigjoj gjatë drejtimit të katërvjeçarit të radhës. Kam dëgjuar ofendime, por do të shmang me sportivitet shpifjet dhe ofendimet që do të vijnë. Dëshiroj të lë pas çfarë kemi kaluar në këto muaj për tu përqendruar te futbolli. Ju falenderoj për besimin dhe do të jem krah jush në katër vitet e ardhshme”, tha Duka.