Arrestimi i shefave të policisë, SPAK njoftim zyrtar: Trafikuan drogë nga 2019-2021

Grupet kriminale  pjesë e të cilave ishin edhe 4 punonjës policie janë përgjegjëse për kultivimin dhe trafikimin e rreth 3 tonëve kanabis nga Shqipëria në drejtim të Greqisë.

Prokuroria e Posaçme deri më tani ka lëshuar 10 urdhër arreste, ku në pranga janë vënë 3 efektivë policie dhe një tjetër është shpallur në kërkim bashkë me 6 persona mes të  cilëve Kristo  Qirici dhe Eldian Allushi që drejtonin një prej gupeve kriminale që operonin në  Sarandë, Tepelene e Gjirokastër.

Në pranga  është vënë, shef i krimeve në komisariatin e Lushnjës, Ervis Alisinanaj, ndërsa aktivitetin krimin rezulton të ketë  kryer në kohën që mbante postin e shefit të  krimeve në qytetin e në Sarandës. Po kështu u arrestua edhe Shkëlzen Ruska, shef i krimeve në Komisariatin e Himarës, ndërsa dyshohet se ka  bashkëpunuar me grupet kriminale në kohën që ka  punuar në drejtorinë e Gjirokastrës në sektorin kundër trafikut të lëndëve narkotike.

Gjithashtu në pranga është vënë edhe Erdit Hazizaj, ish-punonjës policie i larguar në 2022, i cili më herët ka qenë pjesë e  Forcave Operacionale në Policinë e Shtetit. Hazizaj  garoi në zgjedhjet vendore të vitit 2023 për bashkinë e Roskovecit. Ndërkohë është shpallur në kërkim Elvis Dervishi, shef i Policisë Kufitare të Sarandës i cili akuzohet se ka ndihmuar grupin kriminal të kalonte drogë në kohën kur mbante detyrën e Shefit të Pikës së Kalimit Kufitar Qafë Botë .

Grupi kriminal i drejtuar nga Kristo Qirici dhe Eldian Allushi akuzohet për trafikimin  nëpërmjet pikës së Qafë-Botës në Greqi  të një sasie prej 1150 kg kanabis, kanabis të përpunuar çokollatë si dhe vaj kanabisi vlera e të cilit përllogaritet në 1.7 milionë euro. Me anëtarët e këtij grupi kanë bashkëpunuar  edhe dy punonjësit e policisë, Elvis Dervishi  dhe Erdit Hazizaj.

Ndërsa rasti i dytë lidhet me sekuestrimin e një  sasie prej 1.3 tonë kanabis që u gjet në vitin 2020 nga policia e Gjirokastrës.  Sipas hetimeve droga u gjet në një furgon  shumë pranë Tepelenës. Për kultivimin dhe trafikimin e lëndës narkotike si dhe lehtësimin e pozitave penale të personave të përfshirë në këtë aktivitet kanë bashkëpunuar edhe efektivët Shkëlzen Rsuka dhe Ervis Alisinanaj.

SPAK thotë se grupet kriminale ishin angazhuar edhe në pastrimin e parave të fituara nga ky aktivitet, përmes investimit  në pasuri të paluajtshme dhe të luajtshme. Gjatë ekzekutimit të masave të sigurisë, janë gjetur dhe sekuestruar në cilësinë e provës materiale sende të ndryshme si telefona, armë etj., dhe po vazhdojnë kontrolle në banesa dhe ambiente të tjera. Nga hetimet dhe zbardhja e komunikimeve në SKY ECC, kanabisi mbillej në tokë të hapur në rrethina dhe zona të thella, por edhe në ambiente të mbyllura apo siç njihen ndryshe shtëpi bari.

LEXONI GJITHASHTU:

• SPAK godet trafikun e drogës në polici: Në pranga 3 zyrtarë, një në kërkim (Emrat)
• U arrestuan nga SPAK për trafik droge, pezullohen nga detyra shefat e policisë