Arrestohen dy të kërkuar ndërkombëtar, një i akuzuar për kanosje ndaj një gjyqtari

Policia e Shtetit njofton se vijon bashkëpunimi intensiv me autoritetet e huaja ligjzbatuese, në kuadër të operacionit ndërkombëtar “The Wanted”, për lokalizimin, kapjen dhe ekstradimin e shtetasve shqiptarë të shpallur në kërkim ndërkombëtar.

Ekstradohet nga Italia, Hajrulla Xhivini, 42 vjeç, banues në Tiranë, i cili ishte shpallur në kërkim ndërkombëtar pas vendimit të Gjykatës së Shkallës së Parë të Juridiksionit të Përgjithshëm Tiranë, që i kishte caktuar masën e sigurisë “Arrest në burg”.

Shtetasi Xhivini akuzohet për veprat penale “Kanosja për shkak të detyrës” dhe “Prishja e qetësisë publike”, pasi gjatë muajit shkurt 2024, ka kanosur në mënyrë të përsëritur, përmes telefonit, gjyqtarin E. L. të Gjykatës Administrative të Lushnjës, si dhe ka organizuar protesta para Gjykatës së Lartë.

Ekstradohet nga Gjermania Frankfurt, Brian Syzo, 34 vjeç, banues në Korçë, i kërkuar për veprën penale “Prodhimi dhe shitja e narkotikëve”.

Sipas hetimeve të kryera nga autoritetet shqiptare, Syzo akuzohet për shpërndarjen e dozave të kokainës në qytetin e Pogradecit. Gjykata e Shkallës së Parë të Juridiksionit të Përgjithshëm Korçë, i kishte caktuar atij masën e sigurisë “Arrest në burg”.

Të dy shtetasit, pas mbërritjes në Shqipëri, iu dorëzuan Drejtorisë së Përgjithshme të Burgjeve, për të vijuar procedurat e mëtejshme ligjore.