Arrestohen dy zyrtarë të Komunës së Graçanicës nën dyshimin për korrupsion

Policia e Kosovës ka arrestuar dy zyrtarë të Departamentit të Kadastrës në Komunën e Graçanicës nën dyshimin për korrupsion, njoftoi të enjten kryetarja e komunës, Ljiljana Shubariç.

Shubariç nuk dha më shumë hollësi rreth arrestimit të tyre, por theksoi se hetimi dhe arrestimi i zyrtarëve komunalë nuk e vënë në dyshim funksionimin e udhëheqjes lokale të Komunës së Graçanicës apo të Drejtorisë së Kadastrës, shkruan REL.

Ajo tha bëhet fjalë për “veprime të ndërmarra individualisht” nga persona të caktuar.

Komuna e Graçanicës është një nga gjashtë komunat me shumicë serbe në jug të lumit Ibër.

“Do të ketë hetime dhe nuk duam të spekulojmë më tej mbi procedurat e ardhshme. Kur të marrim informacione të detajuara, do të njoftoheni”, tha Shubari# gjatë një adresimi para gazetarëve.

Policia e Kosovës nuk ka folur rreth kësaj çështjeje dhe as nuk ka kthyer përgjigje ndaj pyetjeve të Radios Evropa e Lirë në lidhje me arrestimin e zyrtarëve në Komunën e Graçanicës dhe për hapat e mëtejshëm që do të ndërmerren.

LEXONI GJITHASHTU:

• Zgjedhjet në Kosovë: Sot afati i fundit i emigrantëve për t’u regjistruar
• Dënohet me 3 vite e 8 muaj burg ish-ministri i Infrastrukturës në Kosovë