Arrestohet ish-ministri Lefter Koka

Ish-ministri i Mjedisit Lefter Koka është arrestuar paraditen e sotme në banesën e tij në Durrës me urdhër të SPAK.

Burime për Euronews Albania konfirmojnë se urdhër-arresti i SPAK është miratuar edhe nga GJKKO e cila ka caktuar masën arrest me burg për ish-zyrtarin e lartë.

Gazetari Eni Ferhati raportoi se SPAK pritet të dalë me një njoftim zyrtar lidhur me këtë arrestim.

Ish-ministri sipas të njëjtave burime akuzohet për “shpërdorim detyre”, “pastrim parash” dhe “korrupsion” në kohën kur drejtonte Ministrinë e Mjedisit, lidhur me çështjen e inceneratorëve.

Dosja e inceneratorëve po hetohet prej dy vjetësh nga SPAK nën drejtimin e prokurorit Dritan Prençi. Besohet se do të ketë edhe ish-zyrtarë të tjerë të arrestuar lidhur me çështjen e incenaratorëve.

Lefter Koka fitoi mandatin e deputetit të Durrësit nën siglën e PS në zgjedhjet e fundit të 25 prillit, por pak muaj më vonë hoqi dorë nga mandati.

Ai ka mbajtur postin e ministrit të Mjedisit nga viti 2013-2017.

LEXONI GJITHASHTU:

• Kush është Lefter Koka, lëvizjet nga PS te LSI të ish-kryebashkiakut të Durrësit