“Arritje e merituar” – Sali Berisha përshëndet liberalizimin e vizave për Kosovën

Kreu i Rithemelimit Sali Berisha ka përshëndetur liberalizimin e vizave për Kosovën. Përmes një postimi në faqen e tij në Facebook Berisha thotë se kjo është një arritje e madhe plotësisht e merituar për shtetin e Kosovës dhe qytetarët e saj.

Nga “arresti i shtëpisë” ku po qëndron pas vendimit të GJKKO, Berisha nuk i ka kursyer akuzat për kryeministrin Edi Rama të cilin e cilëson si armikun e lëvizjes së lirë të qytetarëve të Kosovës

“Të dashur miq, Iiberalizimi i vizave sot me 1 janar është një arritje e madhe plotësisht e merituar për shtetin e Kosovës dhe qytetarët e saj. Prej vitesh Kosova ka plotësuar çdo kriter për këtë vendim realisht historik. Por kjo është një goditje e rëndë dhe e merituar për argatin, puthadorin e Vuçiçit, që me urdhër të këtij të fundit do të bëhej i vetmi qeveritar në rajon dhe Europë që pafytyrësisht si armik i egër i qytetarëve të Kosovës dhe lirive të tyre kërcënonte e lobonte për anulimin e këtij vendimi dëshpërimisht edhe pasi ky vendim ishte votuar në Parlamentin Europian.

Një urim të përzemërt për qytetarët e Kosovës për kartolinën më të bukur për vitin 2024 që morën sot nga BE.

Turpi mbuloftë armikun e lëvizjes së lirë të qytetarëve të Kosovës, argatin e Beogradit, shqipfolsin albanofob Edivin Kristaq Rama. Rroftë Kosova! #sb”, shkruan Berisha në Facebook.

LEXONI GJITHASHTU:

• Në arrest shtëpie, Berisha uron Vitin e Ri: Shqipëria u gdhi sot si Bjellorusia
• Iu caktua masa e sigurisë, Berisha reagon për herë të parë nga “Arresti në shtëpi”