Juventusi ka pësuar humbjen më të thellë në shtëpi në 58 vitet e fundit, dhe ishte Atalanta skuadra që i mposhti bardhezinjtë të dielën. Përballja e vlefshme për javën e 28-të u mbyll me shifrat 0-4.
Ecuria pozitive e Juventusit me disa fitore radhazi ka ardhur në fund, me bardhezinjtë që u mposhtën në duelin me Atalantën, të luajtur në shtëpi. Një humbje që peshon shumë dhe irriton edhe më tej tifozët e zonjës së vjetër, të cilët, pavarësisht disfatës, ruajnë vendin e katërt. Të dielën, bergamaskët triumfuan me poker golash, duke i dhënë një shuplakë të fortë Thiago Mottës dhe lojtarëve të tij, ndërsa goli i parë i sfidës erdhi nga Retegui në minutën e 29’.
Në fraksionin e dytë, miqtë realizuan dhe 3 herë të tjera, me De Roon, Zappacosta dhe Lookman, duke zhvilluar një ndër ndeshjet më të mira të sezonit. Kjo ishte humbja më e thellë për bardhezinjtë në shtëpi që prej momentit kur stadiumi mori emrin Allianz. Jo vetëm kaq, por në 58 vitet e fundit, Juventus kurrë nuk ishte mposhtur me diferencë 4 gola nga një skuadër në kampionatin Italian. Në vitin 1967, rivalët e qytetit, Torino, ishin ata që ia shkaktuan një humbje të tillë.
Sa i përket sezonit aktual, Juventus ruan vendin e katërt, por në rast se Lazio fiton në mbrëmje, atëherë janë kryeqytetasit që ngjiten, me bardhezinjtë që zbresin një pozicion.
LEXONI GJITHASHTU:
- Pas eliminimit nga Champions, Empoli “shuplakë” Juventusit në kupë
- Juventus ngjitet në vendin e katërt, “presion” Interit dhe Napolit
