Atentati ndaj ish-prokurorit, rrëzohet kërkesa e Plaurent Dervishajt për përjashtimin e trupës gjykuese

Gjykata ka rrëzuar kërkesën e Plaurent Dervishajt dhe avokatëve të tij për përjashtimin e trupës gjykuese në procesin ku ai po gjykohet për atentatin ndaj ish-prokurorit Arjan Ndoja dhe Aleksandër Lahos, i njohur si “Rrumi”.

Gjatë seancës, avokatët e Dervishajt kundërshtuan trupën gjykuese duke deklaruar se nuk janë marrë parasysh provat që ata kanë kërkuar të administrohen në proces.

“Nuk garantoni paanshmëri, nuk e kuptojmë nxitimin tuaj”, u shprehën mbrojtësit ligjorë para gjykatës.

Edhe vetë Plaurent Dervishaj iu drejtua kryesueses së trupit gjykues me pretendimin se kërkesat e mbrojtjes janë neglizhuar.

“Kemi bërë 800 kërkesa dhe nuk na i merrni parasysh”, deklaroi ai në sallën e gjyqit.

SPAK ka kërkuar dënimin me burgim të përjetshëm për Plaurent Dervishajn lidhur me atentatin ndaj ish-prokurorit Arjan Ndoja dhe Aleksandër Lohos, ngjarje në të cilën humbi jetën shoferi Andi Maloku.

Në të njëjtën dosje po gjykohet edhe Julian Meçe, për të cilin Prokuroria e Posaçme ka kërkuar dënimin me 35 vite burg. Seanca e radhës, ku pritet të paraqiten konkluzionet e mbrojtjes, është shtyrë për në datën 29 maj.

Më 1 nëntor 2019 një atentat me breshëri automatiku u bë ndaj ish- prokurorit Arjan Ndoj pranë mbikalimit të Shkozetit. Prokurori Ndoja ishte në automjet me një person me precedentë penalë, Aleksandër Laho alias Pëllumb Muharremi dhe Andi Malokun. Maloku ishte shofer i prokurorit, i cili mbeti i vdekur.