Atentati në Shkodër, Hamza Lici dhe Arlind Bushati kishin 3 pistoleta me vete

Policia ka njoftuar se brenda makinës me të cilin udhëtonin Hamza Lici dhe Arlind Bushati në momentin kur u qëlluan me breshëri nga persona ende të paidentifikuar janë gjetur 3 pistoleta.

Bëhet fjalë pë masakrën e ndodhur këtë të mërkurë në Dobraç të Shkodrës ku mbetën të vrarë Hamza Lici, vëllai i të shumëkërkuarit Ibrahim Lici dhe një kalimtare e rastësishme, Flutura Basha.

Gjithashtu u plagosën rëndë Arlind Bushati, djal i ish-kandidatit për bashkinë e Shkodrës, dhe bashkëshorti i viktimës Flutura Basha, Bashkim Basha.

“Në vijim të informacionit të dhënë më parë për ngjarjen e ndodhur në aksin rrugor “Shkodër-Koplik”, në Dobraç, ju informojmë se:

Nga kontrolli i ushtruar në automjetin që udhëtonin shtetasit H. L., dhe A. B., u gjetën 3 armë zjarri (pistoleta).

Ndërkohë shërbimet e Policisë gjatë kontrollit të zonës për kapjen e autorëve, në fshatin Golem kanë konstatuar të djegur plotësisht një automjet tip “Range Rover” dhe 2 armë zjarri automatike”,-thuhet në njoftimin e policisë.