Audio-përgjimi i Artan Lames, presidenti Meta: Për Rilindjen, shqiptarët janë mish për top

Pas çështjes së përdorimit të të dhënave personale, një tjetër publikim ka shkaktuar reagime të forta. Bëhet fjalë për një audio-përgjim të kreut të Kadastrës, z. Artan Lame, i cili është regjistruar në një mbledhje me vartës të tij, ku dëgjohet të thotë se pronarëve nuk duhet t’u thuhet e vërteta për leje legalizimi që nuk mund të jepen, pasi çojnë vota tek opozita.

Për audio-përgjimin e publikuar nga gazetari Artan Hoxha, i shpejtë dhe i ashpër ka qenë reagimi i Presidentit Ilir Meta në rrjetet sociale, i cili kërkon që rasti të hetohet për të nxjerrë sipas tij të vërtetën e një skandali që meriton ndëshkim.

“Një audio-përgjim tronditës, që provon se për “Rilindjen” shqiptarët janë “mish për top”, ndërsa zyrat e shtetit, janë kthyer në strofulla të fuksave… Pres nga Drejtësia të zgjohet dhe të nisë menjëherë hetimet për këtë skandal të rëndë”, u shpreh kreu i shtetit.

Edhe kryetari i Partisë Demokratike, Lulzim Basha, e quajti kriminale mënyrën se si Lame drejton zyrën e Kadastrës, por edhe fushatën e legalizimeve.

“Ky është një akt kriminal sepse në ato shtëpi që do t’i prishë pas 25 prillit është sakrifica e jetës, e fëmijëve, e bijave dhe bijve tuaj në emigracion. Premton legalizim kur në fakt qëllimi është tua prishë pas zgjedhjeve vetëm që tua marrë votën me mashtrim. Ky është Edi Rama i 8 viteve”, tha kryedemokrati.

Por, drejtori i Kadastrës është përgjigjur duke thënë se zëri i tij është regjistruar në tetor 2017, dhe aty synohet zgjidhja për lejet e legalizimeve dhe jo bllokimi.

“Aty jemi pas zgjedhjeve të vitit 2017, pra nuk mblidhemi për të blerë vota se votat i kishim marrë, dhe po diskutojmë se si do të trajtojmë objektet që, me ligjin e trashëguar nga Saliu, nuk mund të legalizoheshin dot”, është përgjigjur kreu i Kadastrës.