Autobusi i shkollës përplas turmën me njerëz në Kinë, lë të vdekur 11 persona

Një autobus shkolle përplasi një turmë njerëzish duke vrarë të paktën 11 persona, përfshirë pesë studentë, në provincën Shandong të Kinës, raportojnë mediat shtetërore vendase.

Sipas mediave të huaja, disa të tjerë mbetën të plagosur, duke përfshirë një prej tyre në gjendje kritike.

Autobusi duket se është përplasur me nxënësit dhe prindërit teksa ata po qëndronin jashtë portave të një shkolle në qytetin Tai’an.

Drejtuesi i mjetit “ka humbur kontrollin” e mjetit, raportojnë mediat shtetërore dhe është vënë në arrest, ndërsa policia po heton shkaqet e ngjarjes. Nuk dihet nëse ngjarja ka qenë e qëllimshme.

“Deri më tani, gjithsej 11 persona kanë vdekur (përfshirë gjashtë prindër dhe pesë studentë),” konfirmoi media shtetërore kineze, pasi autobusi goditi një grup prindërish dhe fëmijësh në anë të rrugës.

Dymbëdhjetë të tjerë janë në gjendje të qëndrueshme.

Imazhet dhe videot e incidentit po shpërndahen në rrjetet sociale, duke treguar njerëz që duken të bllokuar nën automjet.

Kjo vjen vetëm pak ditë pasi studentët u kthyen në shkollë për fillimin e vitit të ri akademik.

Aksidentet vdekjeprurëse të trafikut janë një dukuri e shpeshtë në Kinë. Në korrik të këtij viti, policia tha se një automjet u përplas me një grup këmbësorësh në qytetin qendror të Changsha, duke vrarë tetë persona dhe duke plagosur disa të tjerë.

LEXONI GJITHASHTU:

• Reagon Dogana e Prishtinës: Nuk nisëm mbetje të rrezikshme në Kinë
• Starmer për ‘diskutime të sinqerta’ me Kinën, propozon fushat e bashkëpunimit