Autori i Monumentit të Pavarësisë i indinjuar për ndryshimin e veprës

Krijuesi i monumentit të pavarësisë Mumtaz Dhrami: Nëse do e shihnin kolegët e mi projektin e ri, do skandalizoheshin

Një nga autorët e Monumentit të Pavarësisë, Mumtaz Dhrami, është shprehur kundër rikonceptimit të veprës që ndodhet në qytetin e Vlorës.

Sipas skulptorit, projekti i ri nuk përcjell asnjë emocion për spektatorin.

“Monumenti gjithnjë mendohet me pjesën arkitektonike, duke i hequr këtë pjesë dhe duke ndryshuar raportin mes spektatorit dhe monumentit, duke i hequr bazamentin ku njerëzit hipnin përmes shkallëve”, shprehet Dhrami.

Monumenti i Pavarësisë i ndërtuar nga Kristaq Rama, Muntaz Dhrami, Shaban Hadëri në Vlorë në vitin 1972 dhe i mbuluar me bronz, është i lartë 17 metra.

Në qendër të grupit skulpturor është figura e Ismail Qemalit, kryetarit të parë të shtetit shqiptar.

Sipas Dhramit, si i vetmi autor që jeton ende, atij nuk i është marrë asnjë mendim për ndryshimin e bërë.

“Kristaqi, Shabani dhe Koçua kanë vdekur, vetëm unë jam gjallë por nuk më ka pyetur njeri për ndryshimin e monumentit të pavarësisë. Jam kundër kësaj vendosje që kanë menduar, humb çdo lloj marrëdhënie e monumentit me spektatorin”, thotë skulptori.

“Monumenti tani, duket sikur është bërë një skulpturë  dekorative e ndonjë shtojzavalle, dhe nuk ka asnjë linjë që lidhet me monumentin e nuk krijohet ai emocioni i veçantë. Muri prej betoni nuk ka të bëjë fare me frymën e monumentit. Nëse kolegët do e shihnin do skandalizoheshin”, përfundon Dhrami.

Në rrëfimin e tij artisti Dhrami, kujtoi dhe momentin kur u hodhën idetë e para për krijimin e monumentit të pavarësisë, ku veçoi bashkëpunimin me kolegët Kristaq Rama, Shaban Haderi, e Koço Çomi.